I håb an Auftråg, dass i's net vergiss
   von unsern Wirt, der wås so leiwând is
   der sågt: Des echte Wien, då kummst auf amoi drauf
   des taucht erst so nåch zwa, drei Vier'ln auf
   Is wie Atlantis a vasunkne Stådt
   die nur der siecht, der wås an Spiagl håt
   Die schenste Zeit vageht jå eh so schnöö (schnell)
   kummst aus'n Beisl, is scho wieder höö (hell)

   Drum liaber Freind, verzeih, wânn i di heit verzah
   såg ned na

   I muaß Wien wieder amoi (einmal) g'spürn
   des geht ma o (mir ab) – wås soll i måchn
   a påar Glasln inhaliern
   a bissl schmähfian (führen), wieder låchn
   Lâng is her
   - wânn wår des? – I waß scho
   nimmamehr
   gânz klår, des wår – wås,
   so lâng wårn mia (wir) scho ned flaniern?

   I muaß Wien wieder amoi g'spürn
   muaß schaun ob's iwahaupt (überhaupt) no' då is
   muaß mi irgendwo verliern
   wo ålles so bekânnt und nåh is

   Då schau her
   - du lebst a no' (auch noch)! – åber
   bitte sehr
   ana wa' no' (einer wäre noch) frei, a Sessl
   derf i wås spendiern?

   I muaß Wien wieder amoi g'spürn
   Mia wean an Koda (Kater) hâm, an irrn
   mia tan uns vuasetzlich (vorsätzlich) ruiniern
   weu (weil) mia woin (wollen) Wien wieder amoi g'spürn

   Hasi, hupf in d' U 4
   und kumm schnöö (schnell) zu mir
   Hasi, daß i da's lern
   wie die Züge verkehrn
   (Roland Neuwirth)

   "Mein Herr, entschuldigen Sie
   Steign Sie aus oder wie?"
   "Na (nein), i fåhr bis in d' Remis'
   Weu a (weil eine) Türstörung is!"
   (Roland Neuwirth)

   Die U-Bahn is pünktlich
   die U-Bahn is schnöö (schnell)
   Wann i weida liagn tua (wenn ich weiter lüge)
   Dann kumm i in d' Höö (Hölle)
   (Anne Winter)

   Die U-Bahn is pünktlich
   die U-Bahn is gschwind
   wânn i a so warad (wenn ich auch so wäre)
   dânn häsd (hättest du) scho a Kind
   (Klaus Medek)

   I wår a amoi (einmal) jung
   jetzt bin i a scho oid (auch schon alt)
   und jetzt kânn i nur hoffn
   die U-Bahn kummt boid (bald)
   (Hansi Treitsack)

   There's no way out of this U 2
   Honey I'll be late comin' home to you
   Try to get up but I'm held fast
   'cause of all this bubble gum stuck to my ass
   (Mike Maloy/Roland Neuwirth)

   - WUMM -! "Na au!"
   "Entschuldign S', gnä' Frau ...!"
   "Na gehn S' schon weg, das hab ich gar nicht gern!
   Da kann ich ja gleich Ihre Sekretärin wer'n!"
   (Roland Neuwirth)

   Kommt Herr Braun an
   in der Braunschweiggassn
   muaß er dort die andern
   redn lassn
   (Helmut Wemer)

   âm Nestroy-Plåtz mecht i
   de Gstanzln wem zeign
   doch dem tan bedeutende
   Zweifeln aufsteign
   (Hans Werner Sokop)

   Mei Kopfhörer, sågn Sie
   der schdeat (stört) scho seit Hietzing?
   Gnä' Frau, passn S' auf
   Oder woins (wollen Sie), dass i mitsing?
   (Tscho Theissing)

   Vom Schottentor weg
   fåhrt die U-Bahn ums Eck
   owa (aber) nåchher beim Råthaus
   fåhrts eh wieder grådaus
   (Tscho Theissing)

   Von Ober St. Veit
   nach Unter St. Veit
   is' wirklich, åber wirklich
   åber wirklich ned (nicht) weit
   (Christian Tesak)

   Ich hab mir für die U-Bahn
   einen Sitzplatz reserviert
   aber trete ich herzu, dann
   hat ihn meistens wer storniert.
   (Eva Chwosta)

   Wir fahr'n heut mit der U
   erst zum Ich, dann zum Du
   Was ist das? fragt der Franzl
   Nu, ein hochdeutsches Gstanzl
   (Paul McPaulchen)

   Sieh die hochtoupierte Tante
   drüben an der Bahnsteigkante:
   Ihr Pinscher grinst und pisst aufs Gleis
   weil er nichts von Elektrik weiß
   (Sean McKentsy)

   Frågt ana: "He Bimbo
   was du machen in Wien?"
   "Erst promovier' ich in Germanistik
   dann studier ich Medizin."
   (Helmut Wemer)

   "Hean S' (hören Sie), Sie schbeim (kotzen) da am Perron?
   Wie kumm i ma vua? (Wie komme ich mir vor?)"
   "I woit (wollte) eh in Waggon schbeim
   owa (aber) de Tian (die Türen) wårn scho' zua (zu) ..."
   (Helmut Wemer)

   Die Kåtz håt âm Prâterstern
   An leiwândn Koda (Kater) gern
   Des taugt eahm (ihm), des hoda (hat er) gern
   Er mechert (möchte) nur ned Voda (Vater) wer'n
   (Tscho Theissing)

   Jeder håt in der U3
   wem zum ânhaltn dabei
   Aus gegebenem Mangel
   hoid i des Schdangl (halte ich die Stange)
   (Christian Scheindl)

   Ob Fåhrschein, ob Vier'l
   es hat ois (alles) seinen Preis:
   Fåhrn tua i schwoaz (schwarz)
   owa saufn nur weiß
   (Vincenz Wizlsperger)

   "Des is a Hundefåhrkårtn –
   Då zåhln S' Stråf', åber fix!"
   "Wânn S' woin (wollen) kânn i böön (bellen)
   owa zåhln tua i nix."
   (Helmut Wemer)

   Drobn auf der Pilgrambruckn
   fângt a Schaß (Furz) mi ân zum druckn
   erst auf der Kettenbruckngåssn
   håb i eahm dânn ausselåssn
   (Alexander Gross)

   Heite drah i mi ham (heute bringe ich mich um)
   hau mi unter d' U4
   owa soit des (aber sollte das) ned hihaun
   gemma muagn auf a Bier
   (Helmut Wemer)

   Då liegt ana am Gleis
   und då steht ana danebn
   der schreit: Des is a Kurzzug
   då bleibn S' âm Leben!
   (Christian Tesak)

   Mia kamertn (wir kämen)  – Sie wissen eh –
   mia wa'n jetzt quasi då (wir wären jetzt sozusagen hier)
   Liegert'leicht was ân? (Läge vielleicht etwas an?)
   a påar Minutn hätt ma no' (hätten wir noch)

   Weu (weil) tätn Sie was woin (wollen) von uns
   es kennt (könnte) jå durchaus sei'
   oiso (also) wânn S' wås brauchertn (bräuchten)
   es stingert Ihna frei (es stünde Ihnen frei)

   Oder sågertn Sie a (auch) die Såche hätt no' Zeit
   dânn måchert uns des a nix
   oiso wa' ois klår so weit (also wäre soweit alles klar)

   Weu wânn Sie eh nix woin tätn dânn wa' ja nix verhåckt
   i man (meine), es hätt jå kenna (können) sei'
   mia hättn jå nur gfrågt

   åber ned, es haßert (hieße) dânn mia seulertn si' o
   (wir würden uns abseilen)
   Wa' eh nix gwesn, guat, dânn wa' ma (wären wir)
    oiso går ned då (also gar nicht hier)

   Weu ned, daß wer wås woitert (wollte), göön S'
   des treffert (träfe) uns jå dânn
   ma' soitert si' (man sollte sich) då ned lâng schbüün
   (spielen)
   weu då tät ma' dânn schaun

   Oisdan (also dann) hätt ma des jetzt a (auch) besprochn
   dânn sågert ma hoid (halt): guat
   gang ma quasi eh kan o (gingen wir also eh niemandem ab)
   dânn wa' ma wieder fuat (dann wären wir wieder fort)

   und soitert ana (sollte einer) fragen, dânn bittschee
   sågertn S' den an (würden Sie demjenigen sagen)
   daß mia (wir) sozusågn går ned dågwesn wa'n
   (hiergewesen wären)

   Lahn di z'ruck, des haut di fiare
   låss di fålln, des baut di auf
   geh in di, dânn sixd di ausse
   (geh in dich, dann siehst du klar)
   kummst auf amoi (einmal) drauf

   Lahn di z'ruck, des haut di fiare
   schålt auf lângsâm, sunst is z'spät
   måch an Punkt und es geht weida
   is doch gscheida oder ned?

   Lahn di z'ruck
   låss di foin ...

   Kânnst ned luftholn, ned verschnaufen
   rennst nur'n Gööd (Geld) nåch rund um d' Uhr
   und hosdas (hast du es), dânn kânnsta går nix kaufen
   då håst ka Zeit dazua

   Bist immer ei'deut (eingeteilt), wås glaubst, wås i bin
   i renn den gânzn Tåg im Kras
   i bin so busy - bis i hi bin
   des is ållas, wås i waß

   Åber amoi (einmal), då steht des gânze Werkl
   amoi, då steht die Partie
   weu dânn liegst auf da Dackn, unter Garantie

   Lahn di z'ruck, des haut di fiare
   låss di fålln, des baut di auf
   geh in di, dânn sixd di ausse
   (geh in dich, dann siehst du klar)
   kummst auf amoi (einmal) drauf

   Lahn di z'ruck, des haut di fiare
   schålt auf lângsâm, sunst is z'spät
   måch an Punkt und es geht weida
   is doch gscheida oder ned?

   Lahn di z'ruck ... nimm an Schluck ...
   schliaf (schlüpfe) aus d' Schuach (Schuhe)
   åtme durch ... lahn di z'ruck!

   A gânz's Jåhr âm Urlaub spårn
   und waß Gott wohi' fåhrn
   wüü (will) i des, brauch i des
   muaß i des hâm (haben)?
   
   Stress hätt i so scho gnua (genug)
   dânn a no' (auch noch) des dazua
   Daß sowås bringt
   i glaubs kaum
   
   I håb a klane Hittn (eine kleine Hütte)
   Veranda in der Mittn
   Schauklstuhl, prima
   då hutsch i mi' imma
   
   Wia wånn i im Hotöö wa' (als wäre ich im Hotel)
   vergeht die Zeit von söwa (von selbst)
   denn i bin scho' längst ân mein Züü (Ziel)
   
   Auf meiner Veranda
   de Fiass (Füsse) auf'm Glanda (Geländer)
   då fiari allaa (führe ich alleine) die Regie
   die herrlichste Szene:
   a polsterte Lehne
   und wer då drauflahnt bin i
   
   Auf meiner Veranda
   nebn dem Oleanda
   då zwitschern die Vogerln gânz schdüü (still)
   und i zwitscher a an
   an leichtern, an schwaran
   jå i bin a echtes Genie
   
   I schbü (spiele) in da Liga
   da ötaren (älteren) Kriega,
   versauf meine Uadn (Orden)
   mit an guadn Wei'
   
   Bevua i mi quöön (quälen) tua
   fias Gööd (Geld) und laud böön (bellen) tua
   då schenk i ma liawa an ei'
   
   Der Wirt, der nimmt ma'n Huat o (ab)
   der Årzt, der nimmt ma's Bluat o
   die Bank nimmt ma's Gööd o
   owa (aber) d' Suagn (Sorgen) nimmts ma ned o
   
   Die Zaga (Zeiger) fressn d' Zeit auf
   die Årbeit frisst ma d'Freid (Freude) auf
   då brauch i scho' a wås fia mi (auch etwas für mich):
   
   Auf meiner Veranda ...

   Mein Gott, die Zeit vergeht, heast meiner Söö
   (bei meiner Seele)
   und wieder a Jahrl mehr âm Bugl (Buckel), göö
   gestern, då wårst no' jung und spritzig drauf
   und heite – jå es nimmt ålles seinen Lauf

   Gestern no' kreizfidöö (kreuzfidel) und pumperlgsund
   und heite winkt scho' der ärztliche Befund
   gestern, då nimmst no' ois (alles) fia'd Sölichkeit
   (für die Seeligkeit) in kauf
   und heite – sixt so nimmt ålles seinen Lauf

   Triff i an oidn Schuifreind (einen alten Schulfreund)
   glaub i, i wer' a Nårr
   der ane håt a Wâmpn (fetten Bauch)
   der ândre kane Håar
   der ane is a Sandler (Penner)
   der ândre a Primar
   und jeder klane Depp
   is heut a ausgwåchserna

   Mei Frau sågt: "Du bist scho wiara oida Schuach
   (wie ein alter Schuh):
   ob'n ziemlich hi' (kaputt) und untn durch!"
   Åber des regt mi ålles längst scho' nimma auf
   weu schließlich – es nimmt ålles seinen Lauf

   A Bacherl, des rinnt owe (hinunter)
   weu wânns auffe (hinauf) rinna tät
   då gabads (gäbe es) jå des ned
   daß ois (alles) den Båch owe geht
   Ja is des ned a Jâmmer auf derer Wööd (auf dieser Welt):
   Der ane håt'n Beidl (Beutel) und der ândere des Gööd
   (Geld)

   Mein Gott, då fålln die Bla'ln (Blätter) Jåhr für Jåhr
   und nix is heit no' des, wås amoi wår
   Åber amoi haust a du den Deckl drauf
   weu schließlich – es nimmt ålles seinen Lauf

   Er: Wås bin i fiara oide (alte) Haut
   dass kana si ind Nächn (in die Nähe) traut
   I schau mi ân, wås soll i sågn
   i ghear mit'n Thermophor daschlågn (erschlagen)
   Kasweiß und von der Gicht gânz schief
   so lieg i ântrenzt (angesabbert) in mein Mief
   so wer'n s' mi findn, såg i dir
   und an jedn graust vua (vor) mir

   Sie: I lieg nebn eahm ois oide Frau
   nur der Plafond schaut mi no' ån
   Die Goldne Hochzeit, die wird siaß
   mit Schdizschdrimpf um die Wossafiaß
   (mit Stützstrümpfen um die Wasserbeine)
   Im Glasl drinnan, wiara Wrack
   da liegn die fålschn Zähnt (Zähne) âm Gnack
   Wânn mia auf d' Gåssn zeppeln tan
   dânn tuan si d' Leut auf d' Seitn drahn

   Beide:
   Jå schau da ân, die zwa
   der oide Hawara
   mit seiner Hawarie
   heast san die no' net hi'?
   die lernen's sterbn nie
   Mir scheint, i glaub, i tram
   die finden nimmer ham
   in die Geriatrie
   der oide Hawara
   mit seiner Hawarie

   Er: Die Zöön verfålln, i heas direkt
   (die Zellen verfallen, ich kann es direkt hören)
   wia der Wurm des Hirn zerbeckt
   Båld wer' i mi' im Park verirrn
   und duat auf ana Bânk dafriern
   In zwa, drei Tåg, i waß genau
   Då scheißn mi' die Taubn scho' ân
   A Jogger findt mi und kummt drauf:
   Då steigt ka Blaserl nimma auf

   Sie: Der Oide bei'lt båld die Schuach
   und i bleib iwa wie der Lurch
   dânn wer' i a an Påscher kriagn
   und Tschick (Zigaretten) aufklaubn auf der Stiagn
   versteck mei Witwenrentn z'Haus
   im Polster und gibs nimma aus
   Und wânn i's find, dânn wirds mi gfrein
   dânn spend i's dem Tierschutzverein

   Beide:
   Jå schau da ân, uns zwa
   der oide Hawara
   mit seiner Hawarie
   heast san mia (wir) no' net hi'?
   Mia lernen's Sterbn nie
   Mir scheint, i glaub, i tram
   die finden nimmer ham
   in die Geriatrie
   der oide Hawara
   mit seiner Hawarie

   Hean S' Sie, schenkn S' ei då
   nur kan Ânstandskomplex!
   Bei dem schlechtn Wei' då
   trink i nur auf ex
   und a weu (weil) er ex fia (für) mi is
   und eh scho ois (alles) hi is fia mi
   
   Wiara (wie ein) Hund håst di g'schlichn
   fia di' wår ålls glått
   jetzt is die Zech hålt beglichn
   und i bin bankrott
   und i håb dir ålles gebn
   wås håst gmåcht aus mein Lebn - und i
   
   I håb die Welt neuch erfundn
   wiaris jede Nåcht lâng tua
   und i denk ma scho seit Stundn
   a die Menschn gleich dazua
   
   I håb die Welt neuch erfundn
   und jetzt hoff i immer nur:
   in der Welt, wo i bin
   kummst du nimmer vua
   
   I kânn går nix måchn
   passè is passè
   i tätert wirklich gern låchn
   und voll driwasteh (drüberstehn)
   Kumm jå ned z'ruck, låss mi lahna (in Ruhe)
   du tepperter klana, du Bua
   
   I håb die Welt neuch erfundn ...

   Rennt mir heit ana iwan (einer über'n) Weg
   mit dem i sötn (selten) Umgang pfleg
   denn der lebt auf großem Fuß
   siech (sehe) i dânn mi, kriag i den Blues
   weu (weil) i, schau i mei Konto durch
   pass scho' jetzt nimmer in d' Schuach
   
   "Hallo, Sie!" sågt er zu mir
   "Ich flieg heut an d' Cote d'Azur
   wenn Sie Lust hâm, schaun S' vorbei
   mein Appartment steht Ihnen frei!"
   
   Natürlich håt er ned drân denkt:
   a so a Ticket kriagst ned g'schenkt
   Då schdö (stelle) i d' Fiaß in a Lawua (Waschschüssel)
   und huach ma ân den Aznavour
   und wenn i d' Aug'n aufmåch, bin
   i scho' wieder z'ruck in Wien ...
   
   Vielleicht håb i sogar no'
   wo a Flåschn vom Bordeaux
   desweg'n såg i gleich vua Freid:
   Hean S', Ihr Angebot is g'scheit:
   
   Jå åber so wås
   erzöhn S' (erzählen Sie) ma no' wås
   redn S' weida, Herr Baron
   und bleibn S' nur sitzn auf ihr'n Thron
   sie hâm a Âhnung
   von ana feuchtn Wohnung
   und von Schwammerln (Schimmel) âm Plafond (Decke)
   
   Schon die Maria Antoinette
   die wår âhnungslos, komplett:
   "Wås, die Leut, die hâm kein Brot?"
   håt sie gesågt, "Du lieber Gott -
   soll'n sie Kuchen essen hålt!"
   Die is köpft wur'n (geköpft worden) ziemlich båld
   
   Heite is die söwe G'schicht
   denn viel Unterschied ist nicht
   bei d' Politiker, kummst drauf
   nur die Schädln hâms no' (haben sie noch) auf
   
   Bist von die Steuern scho bestürzt
   wird dir die Pension gekürzt
   Redns da ei': "Tun S' investier'n
   und in Aktien spekulier'n!"
   Frågstas (frägst du sie) dânn "Mit welch'm Gööd (Geld)?"
   schaun sie âhnungslos in d' Wööd (Welt)
   
   Solche Råtschläg von die Herr'n
   nehm ich immer an sehr gern
   g'scheite Tipps san immer guat
   deswegn såg i a sofuat:
   
   Jå åber so wås
   erzöhn S' (erzählen Sie) ma no' wås
   redts nur weida in dem Ton
   und bleibts nur sitzen auf'n Thron
   es håbts a (ihr habt eine) Âhnung
   von ana feuchtn Wohnung
   und von Schwammerln (Schimmel) âm Plafond (Decke)

   I låss die Ândern gern gwinna (gewinnen)
   bevua i mi ånstrenga tua
   I håb kan gesteigerten Ehrgeiz, weu i bin a
   ka Weh, i håb scho gern mei Ruah
   
   Ma' muaß jå ned iwaroi (überall) dabei sei'
   weu oft geht da Schuß eh ins Knia
   Es muß die Wåhrheit ned imma nur im Wie' sei'
   Mânchmål, då liegts a im Bier
   
   Bled samma scho
   åber so bled samma ned
   dass ma ned wissn
   wia's um uns steht
   
   Bled samma scho
   åber so bled samma ned
   a bissl wås geht immer
   bis eh nimmer geht
   
   Finanziell mit'n Kopf unter Wåsser
   sexuell a Minimalist
   hinsichtlich Sport eher a Unterlåsser
   und bei der Årbeit a guada Statist
   
   Åber beim Trankln (Trinken) voi då (voll da) aufm Postn
   denn schließlich: Spaß muß ja sein
   Des Leben is jå schiach (häßlich) wie die laufendn Kostn
   hinsichtlich Sterbeverein
   
   Bled samma scho ...

   I züü (ziele) ins Schwårze und druck o (drücke ab)
   a bozn (perfekter) Schuß, des wa' beinåh
   a Zehna gwesn, schreins ma zua
   åber hålt beinåh hålt nur
   A bissl vawåcklt und zu spät âm Punkt
   då håt ma wås dazwischngfunkt
   's is wia's is, und so gehts oft im Lebn:
   Knåpp vorbei is a (auch) danebn
   
   A Ehe is ka Partnerschåft
   weu då gehts zua, jå då gehts oft
   haß (heiß) her, dass die Fetzn fliagn
   es is ned guat ois (alles) owez'wiagn (hinunter zu würgen)
   Fünf Zentimeter nebn dein' Kopf
   då detoniert der Einbrenntopf
   åber nåchher is ålles guat und ois (alles) vergebn
   weu knåpp vorbei is a danebn
   
   Jå, es gibt Leit auf dera Wööd (auf dieser Welt)
   san pumperlgsund und ham gnua Gööd (genug Geld)
   und trotzdem tan sa si nur lad (tun sie sich nur leid)
   es is eahna entsetzlich fad
   Då kenn i aran (auch einen) von diese Leit
   dem håt des Leben nimmer gfreit
   er håt si owegstürzt (hinabgestürzt) vom sechstn Stock
   wåcht auf im Spitål, des wår a Schock
   jetzt sitzta im Roischdui (Rollstuhl) für den Rest
   von seinem Lebn
   weu knåpp vorbei is a danebn

   I lieg auf der Couch
   und jâmmer und knautsch
   No' so a Tagerl (noch solch ein Tag)
   und mi fians (führen's) im Wagerl
   
   Wie aufbåhrt lieg i
   vor meinem TiVi
   då reißt mi a Mödung (eine Meldung)
   aus der Lethargie:
   
   Es könnt sich bald lohnen
   einen Menschen zu klonen
   nåch Schåfe und Kühe
   måcht des keine Mühe
   
   Na, wa' des a Wâhnsinn
   hätt i so an' Klon
   den schick i in d'Årbeit
   und geh in Pension
   
   I und mei Klon
   mia (wir) sind eine Person
   weu i hålt eahm geheim
   keiner weiss was davon
   
   dass er stått mir årbeitet
   i bin fasziniert:
   mei Klon geht in d' Håckn (zur Arbeit)
   und i bin saniert
   
   Und siecht (sieht) mi mei' Frau
   mit ândere, nau
   dânn såg i hålt afoch (einfach):
   Gnä' Frau, uns gibts zwafoch (zweifach)
   
   i bin går net er
   weu der årbeit gråd schwer
   i bin sozusågn
   sein Klon bitte sehr
   
   Und kriag i dânn ane (eine)
   geklont, so a klane (kleine)
   dânn såg i: "Net schlågn S' mi
   wânn S' mir ned glaubn frågn Sie
   
   doch nåch in der Firma
   dânn hâm S' den Beweis!"
   und geh, dass ned siecht
   wiari's (wie ich das) Låchn verbeiß
   
   I und mei Klon
   mia (wir) sind eine Person
   weu i hålt eahm geheim
   keiner weiss was davon
   
   Dass er fia mi årbeit
   i bin fasziniert:
   Mei Klon geht in d' Håckn
   und i sitz beim Wirt

   Bin ein gelernter Menschenfreund
   ich sehe vieles ein
   darum, wenn jemand Hilfe braucht
   dann sag ich auch nicht nein
   
   Neben mir, da wohnt ein Herr
   und neulich, so um vier
   da läutet es ganz schüchtern
   steht Herr Blaskowitz vor mir
   
   Gehn S' Herr Nåchbår, wa' (wäre) des måchbår
   Sie endschuldign scho'
   muagn kummt der Rauchfângkehrer
   åber i bin ned då
   
   Sie tätn mir an G'fålln, an großn
   tätn Sie eahm einelåss'n (hinein lassen) –
   weu wia gsågt – ich bin nicht da –
   glaubn Sie, dass des måchbår wa' (wäre)?
   
   "Na selbstverständlich, warum nicht
   das mach ich doch sehr gern!"
   so sag ich zu Herrn Blaskowitz
   zu diesem netten Herrn
   
   Für eine gute Nachbarschaft
   zeig ich mich stets bereit
   als es nach zwei, drei Tagen
   schon wieder bei mir läut:
   
   "Gehn S', Herr Nåchbår, wa' des måchbår
   schaun S', die Såche, die is die:
   I håb leider meinen Schlüssel
   wo verschmissn, wås waß i (was weiß ich) ...
   
   Sie tätn mir an G'fålln, an großn
   tätn S' mi kurz einelåssn
   dass i ânruaf mein Papá –
   glaubn Sie, dass des måchbår wa'?"
   
   Drauf sag ich: "Freilich, kommen S' nur
   und warten Sie bei mir
   bis der Papa mit'm Schlüssel kommt
   Woll'n Sie ein Flascherl Bier?"
   
   Die Dankbarkeit des Blaskowitz
   war rührend, erst sehr spät
   ich glaub, es war'n zwei Wochen
   bis er wieder draußen steht:
   
   "Gehn S', Herr Nåchbår, wa' des måchbår
   schaun S' i håb a Problem:
   I kânn ned zåhln, den Strom hâms odraht (abgeschaltet)
   wo soll i mei Bier hi'gebn?
   
   Sie tätn mir an G'fålln, an großn
   tätn S' mi kurz einelåssn (herein lassen)
   dass i's eikühl, såg'n S' ned na!
   Glaubn Sie, dass des måchbår wa'?"
   
   Gefälligkeiten da und dort
   die soll man nie verwehr'n!
   Er hat jetzt einen Schlüssel, denn
   so tun wir uns nicht stör'n
   
   Und wenn ich manchmal heim komm
   da denke ich mir dann:
   vielleicht hat er ja Frau'nbesuch –
   und läute vorher an:
   
   "Gehn S', Herr Nåchbår, wär das måchbår
   bitte wär'n Sie so nett
   könnt' ich - nur vorübergehend –
   vielleicht kurz in mein Bett?
   
   Sie tät'n mir ei'n Gefålln, ei'n großn
   würdn S' mich in d'Wohnung låssn?
   Ich versprech, dass ich nicht stör'
   Glaubn Sie, dass das måchbår wär? Ja?"
   
   "Schaun S', Herr Nåchbår, mit mir kann man reden."

   "Die Musik ist herrlich
   was sag ich – fulminant!
   Das mein ich jetzt ganz ehrlich ..."
   So sågt der Intendant
   
   "Nur weiterkomponieren
   am nächsten Donnerståg
   werd ich Sie kontaktieren
   dânn måch ma den Vertråg."
   
   Schee (schön), daß i a Gööd (Geld) siech (sehe)
   er håt gsågt, er mödt (meldet) sich
   dânn wår's scho' Mitte März und
   i fåss mir a Herz und
   
   ruaf duat (dort) ân, då hear i'n (da höre ich ihn)
   sågn zur Sekretärin:
   "Ich hab wegfahrn müssen
   lassen S' von mir grüßen."
   
   Då wår i plötzlich voi (voll) im Büüd (Bild),
   då håb i g'wußt wås schbüüd (spielt):
   
   Ma (man) kânn si auf nix mehr verlåssn
   sunst is ma verlåssn sehr gschwind
   wia die Papierln auf der Stråssn
   drahn si die Leit nåch'n Wind
   
   A ötra (älterer) Mânn verfügt no'
   in sein' Testament:
   Wânn er stirbt genügt do'
   Wânn ma eahm (wenn man ihn) verbrennt
   
   Dafia (dafür) hätt er liaba
   daß d' Schrammeln schbüün (spielen) und ka (kein)
   årmsöliga, triaba (armseliger, trüber)
   Orglwimmera
   
   Åber die Verwândtn
   denkn si: wås kânn d'nn
   an Totn des no' kränkn,
   wâmma si des (wenn wir uns das) schenkn?
   
   A Beståttungsfeia
   is scho' so gnua teia (teuer genug)
   bei die Normaltarife
   is d' Orgl inklusive
   Eahm (ihn) wird’s sowieso ned schdean (nicht stören)
   er kânns jå nimma hean (hören)
   
   Ma kânn si auf nix mehr verlåssn ...
   
   Einer engagiert sich
   auf dem Kunstgebiet
   wird öta (älter), etabliert sich
   bis ihm ein Titel blüht
   
   Er denkt si: Gööd (Geld) wa' bessa
   doch immerhin, das Land
   macht mich zum Professa
   ich werde anerkannt ...
   
   Doch einestågs erschreckt er
   denn plötzlich, då entdeckt er
   dass s' jetzt den Schlågersängan
   den Tit'l a (auch) umhängan
   
   Wer musikantenstadelt
   wird hierzulând geadelt –
   wo bleibn denn då die Werte?
   denkt sich der Geehrte
   
   A so an Tit'l brauch i ned!
   und schmeißt eahm ins Klosett
   
   Ma kânn si auf nix mehr verlåssn ...

   Mei Glasl is voi (voll)
   gleich drauf wieder laa (leer) –
   sixt, so gangs oiwei dahi' (so ginge es immer dahin)
   wânn nix ânders z'tuan wa' (wäre)
   (Rudi jun. Stüger)
   
   Heast, erklär ma amoi (einmal)
   de Gschicht mitn Wei':
   Aus Traubn wirda gmåcht
   und in da Birn schlågta ei' (schlägt er ein)?
   (Rudi jun. Stüger)
   
   A Achterl, a Vierterl
   a Hålbe weiß g'spritzt ...
   I sauf heit so lâng
   bis da Rausch richtig sitzt
   (Rudi jun. Stüger)
   
   Es wird drum gebeten,
   dass ma Wein lesn geht ...
   I bleib liawa daham
   i bin Analphabet
   (Rudi jun. Stüger)
   
   Vüü (viele) Flåschn im Kölla,
   dakreiz und daquer (über kreuz und quer)
   nur in unsrer Regierung
   då san no' vüü mehr (da sind noch viel mehr)
   (Herbert Danzer)
   
   Im Parlament ålle zua (betrunken)?
   Na i wår von die Socken
   Håb dânn gheat (gehört), dass de niacht wårn
   (dass die nüchtern waren)
   då bin i daschrockn (erschrocken)
   (Helmut Wemer)
   
   I steh zwår auf die Rot'n
   und i måg a die Weiß'n
   åber ehrlich: auf die Blau'n
   då kânn ma nur schdoiz sei' (stolz sein)
   (Helmut Wemer)
   
   Is der, den i wöhn woit (wählen wollte)
   a Roda, a Göwa (ein Roter, ein Gelber)?
   I glaub, i sauf jetzt sechs Vier'ln
   und wöh mi dânn söwa (und wähle mich dann selbst)
   (Helmut Wemer)
   
   Vom Saufn wird d' Leber
   bisweilen zirrhotisch
   In der Form von romanisch
   bis hin zu spitzgotisch
   (Roman Beisser)
   
   Mit an Hollastaberl (Hollunderstäbchen) in der Hând
   und siebn Åchtln im Hirn
   so kânn a jeder
   's Neujåhrskonzert dirigiern
   (Richard Faderny)
   
   I wår z'schnöö (zu schnell), Herr Inschpekta?
   I glaub, Sie hâm recht
   I håb heit no' ned mein Spiagl
   drum foah i so schlecht
   (Helmut Wemer)
   
   Wânn's Benzin ausgeht
   laa an (fülle einen) Uhudla nåch
   dânn fåhrt dei' Auto
   no' bis Mistlbåch
   (Richard Faderny)
   
   Såg nie zum Hauer:
   der Wein is zu sauer
   Såg eahm nur gråd:
   Der passt guat - zum Sålåt
   (Richard Faderny)
   
   A Lilliputana sågt: „Mir ziagt's ois zaumm
   (Mir zieht sich alles zusammen)
   bei den Wein, wås Sie hâm!“
   Drauf sågt der Wirt: „I bin ka Dumma
   Sie san scho' so kumma!“
   (Roland Neuwirth)
   
   Zerscht (zuerst) saufst di von Sodom
   bis nach Gomorrha
   und wânnsd des iwalebd (überlebt) håst
   bist nåchher a Pfårrer
   (Helmut Wemer)
   
   Wânn da bsofferne Pfarrer
   zur Köchin ned derf
   dânn håt er no' immer
   d' Ministrantnreserv'
   (Herbert Danzer)
   
   A wânn ma z'Weihnåchtn zua is
   (auch wenn man zu Weihnachten betrunken ist)
   greift ma während der Feier
   an Seminaristen
   ned gleich ân die - Nosn
   (Helmut Wemer)
   
   Die Resi håt an Schilling g'schluckt
   drauf håt sie 100 Kreuzer g'spuckt
   Då sågt der Årzt: „Des is jå klår
   sie is jå in die Wechsljåhr.“
   (Helmut Leierer)
   
   I wer' mi heit hamdrahn (umbringen)
   mit'n „Goldenen Schluck“
   und kumm dânn ois (als) Reblaus
   nåch Sievering z'ruck
   (Helmut Wemer)
   
   Guat, dass der Bush
   mehr auf's Ö' (Öl) steht stått âm Wei' (Wein)
   sunst maschiarat de Gretzn
   no' ins Wei'vier'l ei'
   (sonst würde diese Krätze
   noch ins Weinviertel einmarschieren)
   (Helmut Wemer)